Discorso III (Sulla Scuritate)
- Views: 17
Discorso III
(Sulla Scuritate)
Questo omo ha una somma pazzia,
cioè che sempre stenta per non istentare
e la vita se li fugge sotto speranza
di godere i beni con somma fatica acquistati.
Leonardo Da Vinci
’O KALI YUGA
Sérva m’aggio sunnato nera nera;
int’a ’sta sérva steva na creatura
ch’era cchiù scura ’e chesta sérva nera
e nun teneva mana, uocchie e faccia!
Là, voce nun de fronne e manco ’e viento,
nun luceva de juorno raio ’e sole,
mai luna nun ce steva ’ncielo o stella!
Stu munno te sunnato; tale e quale!
Azzarda ’nu varvante ’a spiegazione.
Na mazzamma senza forma e creanza,
tutta genta ca nun tene manera,
carca ’nfame ca nun preggia lummèra.
’O STESSO FATTO
M’aggio sunnato ’o sole stammatina
E pe’ ’ttramente già schiarava juorno.
’O sole ’ncielo, ’nterra, ncimm’o monte,
’O sole ca luceva ’a copp’ all’onna.
E me pareva ca stu sole d’oro
Sbrennesse pure ’nfronte ’a tutt’a genta.
Me so’ scetato e nc’era avero ’o sole,
ma tanta gent’affaccennata e perza.
Sta carca schierchia, ’nfrecula pe’ vie,
nun se mmirava int’a stu specchio d’oro,
nun apprezzava tanta grolia ’e sole.
Currevano currevano aggubbate,
aneme travagliose, acroie rannate!
Ohi, comm’è trist’a genta senz’o sole!
Ohi, comm’è trist’o munno senza grolia!
